John 7
Nengane atoa Iesu karika laghe aaiesoa etana
1Vara me Iesu ghe kasu seela eGalili, me karika ghe aloanna tani sae eJiudia, poli aJiu etoa laghe anna tani uvi ematea. 2Nau angghe aakalakala tani velu eitaua me aJiu etoa laghe ghelei lutu ale kamekame. ▼ 3Nengane atoa Iesu laghe ue etana va, “Kasula me usae eJiudia, me kapum disaepolo atoa aue la tara uunguaam ugheelei. 4Lo ateva eanna va taumattu ngatoa la kilaia karika eaisulia va egheelei voto. Liuna avalua o ughelei isaa o voto, me kosa akapa ateva ekilaio.” 5Nengane atoa laghe auliaa teeia, poli ila tee karika laghe aikaaia ta Iesu.6Iesu ghe uela etaira va, “Naughu karika ghe mae. Am nauimim etokatoka arau. 7Taumattu tale kosa ateva oio karika aue la ssa teeiem. Aue esessaila nonga etaghi, poli aghaulia ngaotu eeleiaaira karika masina. 8Am saela tale nivelu eitaua ngateae. Karika aue asae poli naughu karika ghe mae.” 9Ghe auliaala isaa o inangari, me ghe tokala eGalili.
Iesu ghe lao sio tale nivelu eitaua ngateae nau la ghe ghelei ale kamekame
10Vara nengana atoa laghe kasula tani sae tale nivelu eitaua ngateae, me Iesu ghe vira aimulila. Kasukasuaane karika toa laghe kilaiela, ghe nim kasu einaola tani sae. 11Tale ia o nivelu eitaua ngateae, namuu ta aJiu etoa ngila ghe paepae Iesu, me laghe aikolomainie see va, “Eaa ia?”12Ta polina me taumattu ngatoa ngila ghe olueinia. Katoa laghe ue va, “Iesu masi taumattu ia.” Me katoa laghe ue va, “Enim kamekame taumattu ngatoa.” 13Karika teva ghe aulia isaa o inangari ta mata ngoroi etoa, poli laghe maamatauta kapuira namu ngatoa aJiu etoa.
14Laghe ghaa longotila tale ia o nivelu eitaua ngateae, me Iesu ghe tiuaala tani apasunga voto ta taumattu ngatoa elome tale valavala ateae tale ale manga ateva. 15Namuu ta aJiu etoa laghe soghiaala tani nongoa, me laghe ue va, “Vaalua me ekilakila oroi voto nau karika teva ghe apasungala etana?”
16Iesu ghe liula me ghe uela va, “Karika aghaapasunga nim nannaaghi. Voto aghaapasunga kanna lo ateva ghe sungieghila. 17Arova teva eannaaili tani aimuli tee aloanaane God, aue ghele kila va voto aghaapasunga ekasukasu ta God, me karika va nim kalughu. 18Lo ateva taumattu eauliaa nannaane enim aloanna tani ghelei ararina ateae, me lo ateva ealoanna tani tau sae ararina ateae lo ateva ghe sungiela, voto eauliaa koronna, karika kamena. 19Koronna va Moses ghe tau aatu sio inangari nipaopao etaimim? Me karika teva etaimim eaimuli tee. Mausi sa me am anna tani uvi emateaghi?”
20Taumattu ngatoa laghe ue etana va, “Raroai eteva etam. See eanna tani uvio?”
21Iesu ghe liula me ghe uela va, “Aghe gheleila kateva voto, me am ghe soghieiniela. 22Moses ghe uela etaimim va am iso natuimim taita atoa (karika va tani Moses ghe auliaala, ta tuvuimim atoa). Me am isoisoila tale nau manga ateva. 23Arova am rooroo tani iso aliki eteva tale nau manga ateva, tani nongo usila lo kanna Moses ghe auliaala, o vaalua esessaiem etaghi, poli aghe elei emasina akapala vilikina taumattu ngateva tee tale nau manga ateva? 24Am rau mene aulia gheeleia taumattu tale taataraaimim, am ghelei niaisakei tale ghulughuluena salana.”
Taumattu ngatoa laghe anna tani kila va Iesu tani saa taumattu ia
25Katoa tana taumattu nge Jerusalem laghe ue va, “Ia oia taumattu ngateva la paepaea tani uvia? 26Tarala, epoppoa ta mata ngoroi etoa, me karika la gheelei righi voto etana. Koti namu ngatoa la kilakila va ia Mesaea ia. 27Iekai ita kilakila tanganuena, me Mesaea ngateva, karika aue ita kila va eaa tanganuena.”28Iesu ghe aapasunga tale ale manga ateva, me ghe sama anamungailila, me ghe uela va, “Am anna vara am kilakilaieghi, me vara am kilakila tanganueghi. Aghi karika aghe mae sio tale aloaloanaaghi. Lo ateva ghe sungieghila koronna ia, me am, karika am kilakilaia. 29Aghi akilakilaia, poli aghe tokatoka teeia, me ghe sungieghila tani sio.”
30Katoa taumattu laghe anna tani kuneia, me karika laghe roola tani kuneia, poli nauna karika ghe mae. 31Oroi taumattu ghe aikaaiaala etana, me laghe ue va, “Arova Mesaea ngateva esio, koti voto aue ghelei aue elau llo ia oia taumattu ngateva egheelei?”
Laghe suula polisi etoa tani mae kune Iesu
32Nau Paresi etoa laghe nongola taumattu ngatoa laghe aisakeana, laghe lao sio tani tara namuu ta pristi etoa, ila me namuu ta pristi etoa laghe suula polisi etoa tani laa kune Iesu.33Me Iesu ghe uela etaira va, “Karika oroi nau aue atoka teeiem, me amene kasu tani sae ta lo ateva ghe sungieghila. 34Aue am pae poieghi, me karika aue am taraieghi, poli voto ateva alao etana am karika am rooroo tani lao etana.”
35Taumattu nge Jiu etoa laghe tiuaala tani aikolomieinila va, “Eaa aue elao me karika aue ita taraia? Koti aue lao tale llo masaliki aGrik atoa la ghaitoia, me katoa tani kapuita la tokatoka etana. Koti aue mene laa apasunga ta aGrik atoa. 36Saa malloeana inangarina nau eue va, ‘Aue am pae poieghi, me karika aue am taraieghi’, me ‘Voto ateva alao etana am karika am rooroo tani lao etana’?”
Iesu ghe auliaala ateo ateae maulue ia
37Airuuruu tale ia o nivelu eitaua ngateae, kinatama nauira ateva, Iesu ghe tinginala, me ghe sama anamungailila me ghe uela va, “Lo ateva ukaakangngata tani ropi, umae etaghi me uropi. 38Lo ateva eaikaaia etaghi, aue ateo ateae maulue ia aue eakala elome tale urunguitanina ateva, nongina Uru ngai Manga ateva eaaulia.” 39Iesu ghe aaulia Spirit Manga ateva va lo atoa la aikaaia etana aue la ghaaia. Isaa o nau Spirit Manga ateva karika ghe mae, poli God karika ghe tau sae Iesu.Taumattu ngatoa ghe ghalue ilala
40Katoa taumattu laghe nongola isaa o inangari Iesu ghe aaulia etaira me laghe uela va, “Koronna, taumattu ngateva oia ia o propete ateva Moses ghe aulieniela.” 41Mene katoa laghe ue va, “Ia oia taumattu ngateva Mesaea etana.” Mene katoa laghe ue va, “Karika va aue ekasu eGalili. 42Uru ngai Manga ateva eue va Mesaea ngateva aue elutu ta mangalina atoa Deivit, me aue elutu eBetlehem, ia o masalikina ia Deivit.” 43Taumattu ngatoa ghe ghalue ilala tale ninanna ta poli Iesu. 44Katoa ngila ghe anna tani kuneia, me karika teva ghe roola.Namu ngatoa karika laghe aikaaiaala ta Iesu
45Polisi etoa laghe laa rekata sio, me namuu ta pristi etoa me Paresi etoa laghe kolomilala va, “Vaalua me am tam maea asio Iesu?”46Polisi etoa laghe liula me laghe uela va, “Karika teva taumattu erooroo tani aippoa nongina taumattu ngateva oke.”
47Me Paresi etoa laghe uela va, “Ae! Am tee ange kamekameam? 48Ngam tarala va teva namuu ta aJiu etoa me Paresi etoa eaikaaia etana? 49Lo atoa la ghaikaaia etana karika la kilakila inangari nipaopao, me aue God ekasikienainila.”
50Nikodimas, ia o ghe lao akasina sio ta Iesu, ie tee ghe tokatoka me ghe uela va, 51“Uneita inangari nipaopao eue va, ita rau mene ghelei righi voto ta teva taumattu, ita tani nongo mua va sa ateva ghe eleiela.”
52Me laghe uela etana va, “Koti io tee aGalili io? Uriti Uru ngai Manga ateva, me utara va karika teva propete aue ekasu eGalili.” 53[[ ▼
▼7:53-8:11Llo akasina uru ngai laghe pitila karika laghe pitila Jon 7:53-8:11. Oroila lo atoa laghe pitila kiukiu eteae ta Jon 7:53, me kasina laghe piti reerekatainie ssola. Katoa laghe pitiela elome ta Jon 7:36 me Jon 7:37, me katoa laghe pitiela ta airuuruu ta Jon 21:25, me mene katoa laghe pitiela emuli ta Luk 21:38.
Me laghe tiu reerekataala tani lao tanganueira.
Copyright information for
EMI